ཕྱི་ལོ་ ༢༠༢༦ ཟླ་ ༦ ཚེས་ ༢༦ རེས་གཟའ་པ་སངས་ཉིན། ཕྱི་རྒྱལ་ཁག་ལ་བཞུགས་པའི་བོད་རིགས་གཞོན་སྐྱེས་ཚོར་བོད་ཀྱི་སྐད་དང་ཡི་གེ་དང་ནང་ཆོས་དང་སྒོམ་དང་བོད་ཀྱི་གཞས་སྣ་འཁྲབ་སྟོན་དང་སྒྲ་བརྙན་དང་གླིང་བུ་གཏོང་སྟངས་སོགས་སློབ་ཁྲིད་ཆེད་དུ་དམིགས་ནས་སེར་བྱེས་གྲྭ་ཚང་གིས་གོ་སྒྲིག་ཞུས་པའི་དབྱར་དུས་སློབ་གྲྭ་སྐབས་ལྔ་པ་དེ་སེར་བྱེས་བཀྲ་ཤིས་ཆོས་གླིང་དུ་དབུ་འཛུགས་མཛད་སྒོ་བསྐྱངས་སོང་། སྐབས་དེར་སེར་བྱེས་ཕྱག་མཛོད་དགེ་བཤེས་ངག་དབང་སྙིང་རྗེ་ལགས་དང་། དེང་དུས་ཤེས་ཡོན་འགན་འཛིན་དགེ་བཤེས་བྱམས་པ་ཆོས་དབང་ལགས། དགེ་སློབ་ཕ་མ་བཅས་ཚང་འཛོམས་ཐོག སེར་བྱེས་དྲྭ་ཐོག་སློབ་གྲྭ་དང་། དབྱར་དུས་སློབ་གྲྭའི་ངོ་སྤྲོད་དང་སྒྲིག་གཞི་དང་འཛིན་གྲྭ་ཚུགས་ཕྱོགས་སོགས་ངོ་སྤྲོད་དང། སློབ་མ་ཁག་ཅིག་གིས་རང་ཉིད་སྒེར་གྱི་ངོ་སྤྲོད་དང་མཉམ་ཞུགས་གནང་བའི་དགོས་དམིགས་གསུངས་ནས་མཛད་སྒོ་རེ་ཞིག་གྲོལ་སོང་། འདི་ལོར་སློབ་མ་གྲངས་ ༤༠ ལ་མཉམ་ཞུགས་གོ་སྐབས་ཕུལ་ཡོད།
